Sūtradhāraṇānuśaṃsāparivartaḥ
Technical Details
sūtradhāraṇānuśaṃsāparivartaḥ |
atha khalu bhagavān punareva candraprabhaṃ kumārabhūtamāmantrayate sma-tasmāttarhi kumāra bodhisattvena mahāsattvena mahābhijñāparikarma dhārayitukāmenāyaṃ samādhirdhārayitavyaḥ udgrahītavyaḥ paryavāptavyo dhārayitavyo vācayitavyaḥ pravartayitavyaḥ uddeṣṭavyaḥ svādhyātavyo bhāvayitavyaḥ, parebhyaśca vistareṇa saṃprakāśayitavya | katamacca tat kumāra sarvadharmāṇāmabhijñāparikarma ? yaduta sarvadharmāṇāmaparigrahaḥ aparāmarśaḥ śīlaskandhasyāmanyanā samādhiskandhasya apracāraḥ prajñāskandhasya vivekadarśanaṃ vimuktiskandhasya yathābhūtadarśanaṃ vimuktijñānadarśanaskandhasya svabhāvaśūnyatādarśanaṃ sarvadharmāṇām | yayābhijñayā samanvāgato bodhisattvo mahāsattvaḥ sarvasamādhivikurvitāni vikurvan sarvasattvānāṃ dharmaṃ deśayati | idamucyate kumāra mahābhijñāparikarmeti ||
atha khalu bhagavāṃstasyāṃ velāyāmimā gāthā abhāṣata -
mahābhijñāparikarma avivādena deśitam |
vivāde yastu carati sodgṛhṇan na vimucyate || 1 ||
abhijñā tasya sā prajñā bauddhaṃ jñānamacintiyam |
udgrahe yaḥ sthito bhoti jñānaṃ tasya na vidyate || 2 ||
bahavo'cintiyā dharmā ye śabdena prakāśitāḥ |
yastatra niviśecchabde saṃghābhāṣyaṃ na jānati || 3 ||
saṃghābhāṣyamajānānaḥ kiṃ saṃghāya tu bhāṣitam |
adharmaṃ bhāṣate dharmaṃ dharmatāyāmaśikṣitaḥ || 4 ||
lokadhātusahasreṣu ye mayā sūtra bhāṣitāḥ |
nānāvyañjana ekārthā na śakyaṃ parikīrtitum || 5 ||
ekaṃ padārthaṃ cintetvā sarve te bhonti bhāvitāḥ |
yāvantaḥ sarvabuddhehi bahu dharmāḥ prakāśitāḥ || 6 ||
nairātmyaṃ sarvadharmāṇāṃ ye narā arthakovidāḥ |
asmin pade tu śikṣitvā buddhadharmā na durlabhāḥ || 7 ||
sarvadharmā buddhadharmā dharmatāyāṃ ya śikṣitāḥ |
ye dharmatāṃ prajānanti na virodhenti dharmatām || 8 ||
sarvā vāg buddhavāgeva sarvaśabdo hyavastukaḥ |
diśo daśa gaveṣitvā buddhavāg naiva labhyate || 9 ||
eṣā vācā buddhavācā gaveṣitvā diśo daśa |
na labhyate'nuttaraiṣā na labdhā na ca lapsyate || 10 ||
anuttarā buddhavācā buddhavācā niruttarā |
aṇurna lapsyate'treti tenokteyamanuttarā || 11 ||
aṇu notpadyate dharmo aṇuśabdena deśitaḥ |
aṇumātro na co labdho loke śabdena deśitaḥ || 12 ||
alabdhirlabdhadharmāṇāṃ labdhau labdhirna vidyate |
ya evaṃ dharma jānanti budhyante bodhimuttamām || 13 ||
te buddhānuttarāṃ bodhiṃ dharmacakraṃ pravartayī |
dharmacakraṃ pravartitvā buddhadharmān prakāśayī || 14 ||
bodhisattvāśca budhyante buddhajñānamanuttaram |
tena buddhā iti proktā buddhajñānā prabodhanāt ||15 ||
abhāvo apraṇihitamānimittaṃ ca śūnyatā |
ebhirvimokṣadvārehirdvāraṃ buddhaḥ prakāśayī || 16 ||
cakṣuḥ śrotraṃ ca ghrāṇaṃ ca jihvā kāyo manastathā |
ete śūnyāḥ svabhāvena saṃbuddhaiḥ saṃprakāśitāḥ || 17 ||
etādṛśānāṃ dharmāṇāṃ svabhāvaṃ yaḥ prajānati |
nāsau vivādaṃ kurute jñātvā dharmāṇa lakṣaṇam || 18 ||
eṣa gocaru śūrāṇāṃ bodhisattvāna tāyinām |
na te kadācit kāṅkṣanti jānante dharmaśūnyatām || 19 ||
dharmasvabhāvaṃ jānāti buddhastenocyate hi saḥ |
bodhaye vinayī sattvānaprameyānacintiyān || 20 ||
satkṛto buddhaśabdena śīlaśabdena so kṛtaḥ |
śīlaśabdo buddhaśabda ubhau tāvekalakṣaṇau || 21 ||
yāvantaḥ kīrtitāḥ śabdā hīna utkṛṣṭamadhyamāḥ |
samāhitaikaśabdena buddhaśabdena deśitāḥ || 22 ||
na buddhadharmā deśasthā na pradeśastha kīrtitāḥ |
na cotpannā niruddhā va ekatvena pṛthak tathā || 23 ||
na te navāḥ purāṇā vā na teṣāmasti manyanā |
na ca nīlā na pītā va nāvadatā na lohitāḥ || 24 ||
anābhilāpyā agrāhyā evaṃ ghoṣeṇa deśitāḥ |
na ca ghoṣasya sā bhūmiḥ prātihāryaṃ muneridam || 25 ||
anāsravā hi te dharmā -- nena ucyanti hi |
stṛtā aparyāpannā daśadiśe eṣā buddhāna deśanā || 26 ||
parinirvṛtasya buddhasya dṛśyate buddhavigrahaḥ |
tatsthānaṃ manasīkurvan prātihāryaṃ sa paśyati || 27 ||
na cāsau labhyate sattvo nirvṛtiryena sparśitā |
evaṃ ca diśito dharmo bahavaḥ sattva mocitāḥ || 28 ||
yathā candraśca sūryaśca kāṃsapātrīya dṛśyate |
na ca yāti svakaṃ bimbamevaṃ dharmāṇa lakṣaṇam || 29 ||
pratibhāsopamā dharmā yairhi jñātā svabhāvataḥ |
naiva te rūpakāyena paśyante buddhavigraham || 30 ||
avigraho hyayaṃ dharmo vigraho nātra kaścana |
avigrahaśca yo dharma eṣa buddhasya vigrahaḥ || 31 ||
dharmakāyena paśyanti ye te paśyanti nāyakam |
dharmakāyā hi saṃbuddhā etat saṃbuddhadarśanam | 32 ||
pratītya pratinirdiṣṭā aprati pratideśitāḥ |
imāṃ gatiṃ vijānīta śrāmaṇyena hi ye'rthikāḥ || 33 ||
aprāpti prāpti nirdiṣṭā sattvānāṃ jñātva āśayam |
yo saṃdhābhāṣyottarate na so kena vihanyate || 34 ||
yasya bhoti mayā prāptamaprāptaṃ tena cocyate ||
yena śrāmaṇyamaprāptaṃ tena śramaṇa ucyate || 35 ||
kathaṃ gambhīrime dharmā vakṣyante ye na śikṣitāḥ |
te ca gambhīranāmena na śakyaṃ parikīrtitum || 36 ||
avastukāḥ pañca skandhā abhūtvā eta utthitāḥ |
nātra utthāpyako hyasti yasya skandhāḥ samutthitāḥ || 37 ||
yallakṣaṇāḥ pañca skandhāḥ sarvadharmāstallakṣaṇāḥ |
tallakṣaṇāste nirdiṣṭā lakṣaṇaṃ ca na vidyate || 38 ||
yathāntarīkṣaṃ gaganamevaṃ dharmāṇa lakṣaṇam |
pūrvāntamaparāntaṃ ca pratyutpannaṃ ca paśyantaḥ || 39 ||
agrāhyaṃ gaganaṃ proktaṃ grāhyamatra na labhyate |
eṣa svabhāvo dharmāṇāmagrāhyo gaganopamaḥ || 40 ||
evaṃ ca deśitā dharmā na śrāvako vipaśyati |
yaśco na paśyatī dharmaṃ tasya dharmā acintiyāḥ || 41 ||
asvabhāvā ime dharmāḥ svabhāvaiṣāṃ na labhyate |
yogināṃ gocaro hyeṣa ye yuktā buddhabodhaye || 42 ||
ya evaṃ jānāti dharmān sa na dharmeṣu sajjate |
asajjamāno dharmeṣu dharmasaṃjñā prabodhayī || 43 ||
vibhāvitāḥ sarvadharmā bodhisattvena tāyinā |
dharmasaṃjñā vibhāvitvā buddhadharmānna manyate || 44 ||
amanyamānā hi sā koṭī kalpetvā koṭi vyāhṛtā |
ya evaṃ koṭiṃ jānāti kalpakoṭiṃ na manyate || 45 ||
purimāṃ koṭi kalpitvā bālaḥ saṃsāri saṃsari |
na cāsya labhyate sthānaṃ gaveṣitvā diśo daśa || 46 ||
śūnyaṃ jñātvā ca saṃsāraṃ bodhisattvo na sajjate |
caranti caiva bodhyarthaṃ caristeṣāṃ na labhyate || 47 ||
śakunānāṃ yathākāśe padaṃ teṣāṃ na labhyate |
evaṃsvabhāvā sā bodhirbodhisattvaiśca budhyate || 48 ||
yathā māyāṃ vidarśeti māyākāraḥ suśikṣitaḥ |
nānāprakārarūpāṇi na ca rūpopalabhyate || 49 ||
alabdhilabdhirno manye labdhe labdhirna vidyate |
māyopamaṃ ca tajjñānaṃ na māyāyāṃ ca tat sthitam || 50 ||
evaṃ śūnyeṣu dharmeṣu bālabuddhiṃ vikalpayet |
vikalpe caramāṇānāṃ gatayaḥ ṣaṭa parāyaṇam || 51 ||
jātijaropagāḥ sattvā jātisteṣāṃ na kṣīyate |
jātimaraṇaskandhānāṃ duḥkhaṃ teṣāmanantakam || 52 ||
duḥkho jātisaṃsāro bālabuddhīhi kalpitaḥ |
kalpāsteṣāṃ na kṣīyante kalpakoṭyaśca saṃsarī || 53 ||
ayuktāḥ saṃprayuktāśca karmayogasmi te sthitāḥ |
karmaṇaste na mucyate karmopādāni ye ratāḥ || 54 ||
karmaughe vahatāṃ teṣāṃ karma na kṣīyate sadā |
punaḥ punaśca mrīyante mārapakṣe sthitāḥ sadā || 55 ||
mārābhibhūtā duṣprajñāḥ saṃkliṣṭena hi karmaṇā |
anubhonti jātimaraṇaṃ tatratatropapattiṣu || 56 ||
maraṇaṃ te nigacchanti andhā bālāḥ pṛthagjanāḥ |
hanyante ca vihanyante gatiścaiṣāṃ na bhadrikā || 57 ||
parasparaṃ ca ghātenti śastrebhirbālabuddhayaḥ |
evaṃ prayujyamānānāṃ duḥkhaṃ teṣāṃ pravardhate || 58 ||
putrā mahyaṃ dhanaṃ mahyaṃ bālabuddhīhi kalpitam |
asataṃ karma kalpitvā saṃsāro bhūyu vardhate || 59 ||
saṃsāraṃ vardhayantaste saṃsaranti pṛthagjanāḥ |
pṛthak pṛthak ca gacchanti tena coktāḥ pṛthagjanāḥ || 60 ||
pṛthudharmā pravakṣyanti ujjhitvā buddhaśāsanam |
na te mokṣaṃ labhiṣyanti mārasya vaśamāgatāḥ || 61 ||
kāmanāṃ kāraṇaṃ bālāḥ striyaṃ sevanti pūtikām |
pūtikāṃ gati gacchanti patante tena durgatim || 62 ||
kāmānna buddhā varṇenti nāpi strīṇāṃ niṣevaṇam |
mahābhayo'hipāśo'yamistripāśaḥ sudāruṇaḥ || 63 ||
vivarjayanti taṃ dhīrāścaṇḍamāśīviṣaṃ yathā |
na viśvasanti istrīṇāṃ naiṣa mārgo hi bodhaye || 64 ||
bhāventi bodhimārgaṃ ca sarvabuddhairniṣevitam |
bhāvayitvā ca taṃ mārgaṃ bhonti buddhā anuttarāḥ || 65 ||
anuttarāśca te yuktā bhonti lokasya cetiyāḥ |
anuttareṇa jñānena buddhā bhonti anuttarāḥ || 66 ||
poṣadhaṃ ca niṣevanti śīlaskandhe samādapī |
samādapenti bodhāya sattvakoṭīracintiyāḥ || 67 ||
kurvanti te'rthaṃ sattvānāmaprameyacintiyam |
te te śūrā mahāprajñā tāḍentyamṛtadundubhim || 68 ||
kampenti mārabhavanaṃ cālenti mārakāyikān |
samādapenti bodhāya mārakoṭīracintiyāḥ || 69 ||
paravādīnnigṛhṇanti nirjinanti ca tīrthikān |
kampenti vasudhāṃ sarvāṃ sasamudrāṃ saparvatām || 70 ||
vikurvamāṇā kāyebhiranekarddhivikurvitaiḥ |
nidarśenti mahāprajñāḥ prātihāryānacintiyān || 71 ||
kṣetrakoṭī prakampenti yathā gaṅgāya vālikā |
parājinitvā te mārā bodhiṃ budhyantyanuttarām || 72 ||
nirmiṇvanti ca te vṛkṣān ratanaiḥ suvicitritān |
phalapuṣpehi saṃyuktān gandhavantān manoramān || 73 ||
prāsādāṃśca vimānāni kūṭāgārān saharṣikān |
nirmiṇvanti ca te śūrāḥ puṣkariṇyo manoramāḥ || 74 ||
aṣṭāṅgajalasaṃpannāḥ svacchāḥ śītā anāvilāḥ |
pibanti ye tato vāri tisrastṛṣṇā jahanti te || 75 ||
avivartyāśca te bhonti pītvā vāri niruttaram |
anuttareṇa jñānena bhonti buddhā anuttarāḥ || 76 ||
anuttarāṃ gatiṃ śāntāṃ gacchantīti vijānatha |
imāṃ gatimajānantaḥ pranaṣṭāḥ sarvatīrthikāḥ || 77 ||
te ca tadgatikāḥ sattvā ye teṣāṃ bhonti niśritāḥ |
patiṣyanti mahāghorāmavīcimaparāyaṇāḥ || 78 ||
yāstatra vedanā ghorā na śakyāstāḥ prakīrtitum |
ahaṃ ca tāḥ prajānāmi bodhisattvāśca tāyinaḥ || 79 ||
ye ceha dharme kāṅkṣanti evaṃ gambhīri durdṛśe |
abhūmistatra bālānāmupalambhasmi ye sthitāḥ || 80 ||
nirmiṇvanti viyūhāṃste naikarūpanidarśanān |
yena te sarvi gacchanti buddhakṣetrānanuttarān || 81 ||
yāvantyo buddhakṣetreṣu rūpanirhārasaṃpadaḥ |
sarvāstā iha darśenti bodhisattvā maharddhikāḥ || 82 ||
mahādharmeṇa saṃnaddhā mahāvīrā mahābalāḥ |
mahāśūnyārthavajreṇa prahārāṇi dadanti te || 83 ||
raśmikoṭisahasrāṇi yathā gaṅgāya vālikā |
kāyato niścarantyeṣāṃ yebhirlokaḥ prabhāsate || 84 ||
na te strīṣvabhirajyante na ca teṣāṃ virāgatā |
vibhāvitaiteṣāṃ saṃjñā istrisaṃjñā svabhāvataḥ || 85 ||
aśūnyā buddhakṣetrāste yeṣu śūrā bhavanti te |
kiṃ teṣāṃ māru pāpīyānantarāyaṃ kariṣyati || 86 ||
dṛṣṭīkṛteṣu ye sthitvā bahu buddhā virāgitāḥ |
vyāpādena upastabdhā icchālobhapratisthitāḥ || 87 ||
sarvasaṃjñā vibhāvitvā saṃjñāvaivartiye sthitāḥ |
ya evaṃ jñāsyate jñānaṃ buddhajñānamacintiyam || 88 ||
pūrvāntamaparāntaṃ ca pratyutpannaṃ ca paśyati |
evaṃ ca deśitā dharmā na cātra kiṃci deśitam || 89 ||
na ca jñānena jānāti na cājñānena sīdati |
jñānājñāne vikalpetvā buddhajñāneti vuccati || 90 ||
vijñaptivākyasaṃketaṃ bodhisattvaḥ prajānati |
karoti arthaṃ sattvānāmaprameyacintiyam || 91 ||
saṃjñā saṃjānanārthena udgraheṇa nidarśitā |
anudgrahaśca sā saṃjñā viviktārthena deśitā || 92 ||
yacco viviktaṃ sā saṃjñā yā viviktā sa deśanā |
saṃjñāsvabhāvo jñātaśca evaṃ saṃjñā na bheṣyati || 93 ||
prahāsyāma imāṃ saṃjñāṃ yasya saṃjñā pravartate |
saṃjñā prapañce carati na sa saṃjñātu mucyate || 94 ||
kasyeyaṃ saṃjñā utpannā kena saṃjñā utpāditā |
kena sā sparśitā saṃjñā kena saṃjñā nirodhitā || 95 ||
dharmo na labdho buddhena yasya saṃjñā utpadyate |
iha cintetha taṃ arthaṃ tataḥ saṃjñā na bheṣyati || 96 ||
kadā saṃjñā anutpannā kasya saṃjñā virudhyate |
vimokṣa ciatacārasya kathaṃ tatra utpadyate || 97 ||
yadā vimokṣaṃ spṛśati sarva cintā acintiyā |
acintiyā yadā cintā tadā bhoti acintiyaḥ || 98 ||
cintābhūmau sthihitvāna pūrvameva vicintitā |
sarvacintāṃ jahitvāna tato bheṣyatyacintiyaḥ || 99 ||
śukladharmavipāko'yamasaṃskāreṇa paśyati |
ekakṣaṇena jānāti sarvasattvavicintitam || 100 ||
yathā sattvāstathā cintā yathā cintā tathā jināḥ |
acintiyena buddhena iyaṃ cintā prakāśitā || 101 ||
yo raho eku cinteti kadā cintā na bheṣyati |
na cintāṃ cintayantasya sarvacintā vigacchati || 102 ||
cyute mṛte kālagate yasya cintā pravartate |
cintānusāri vijñānaṃ nāsā cintāntamucyate || 103 ||
ye sthitā istrisaṃjñāyāṃ rāgasteṣāṃ pravartate |
vibhāvitāyāṃ saṃjñāyāṃ na rāgeṇopalipyate || 104 ||
iyaṃ cintā mahācintā dharmacintā niruttarā |
anayā dharmacintāya bhūtacintā pravartate || 105 ||
bahu acintiyā cintā dīrgharātraṃ vicintitā |
na ca cintākṣayo jātaścintayitvā ayoniśaḥ || 106 ||
yo'sau cintayate nāma kṣaye jñānaṃ na vidyate |
na kṣayo bhūmijñānasya kṣayasyo eṣa dharmatā || 107 ||
ghoṣo vākpatha vijñaptiḥ kṣayaśabdena deśitā |
nirviśeṣāśca te dharmā yathā jñānaṃ tathā kṣayaḥ || 108 ||
anutpannāniruddhāśca animittā alakṣaṇāḥ |
kalpakoṭiṃ pi bhāṣitvā animittena deśitāḥ || 109 ||
sarvabhāvān vibhāvitvā abhāve ye pratiṣṭhitāḥ |
na cānyo darśito bhāvo nābhāvo'nyo nidarśitaḥ || 110 ||
vijñaptā bhāvaśabdena abhāvasya prakāśanā |
na cāsau sarvabuddhehi abhāvaḥ śakyu paśyitum || 111 ||
yo bhāvaḥ sarvabhāvānāmabhāva eṣa darśitaḥ |
evaṃ bhāvān vijānitvā abhāvo bhoti darśitaḥ || 112 ||
nāsau sparśayituṃ śakyamabhāvo jātu kenacit |
sparśanāttu abhāvasya nirvṛti eṣa deśitā || 113 ||
ahaṃ buddho bhavelloke yasyaiṣā ho matirbhavet |
na jātu bhavatṛṣṇārto bodhiṃ budhyeta paṇḍitaḥ || 114 ||
na kaṃci dharmaṃ prārtheti bodhisattvaḥ samāhitaḥ |
niṣkiṃcanā nirābhogā eṣā bodhīti ucyate || 115 ||
bahū evaṃ pravakṣyanti vayaṃ bodhāya prasthitāḥ |
imāṃ gatimajānanto dūre te buddhabodhaye || 116 ||
śabdena deśitā dharmāḥ sarve saṃskāra śūnyakāḥ |
yaśva svabhāvaḥ śabdasya gambhīraḥ sūkṣma durdṛśaḥ || 117 ||
mahābhijñāya nirdeśa idaṃ sūtraṃ pravuccati |
arthāya bodhisattvānāṃ sarvabuddhehi deśitam || 118 ||
pratipakṣā hatāsteṣāṃ yāvantaḥ sāṃkileśikāḥ |
pratiṣṭhitā abhijñāsu ṛddhisteṣāṃ subhāvitā || 119 ||
sthitāḥ praṇidhijñānasmiṃstacca jñānaṃ vibhāvitam |
atṛptirlabdhajñānasya aprameyā acintiyā || 120 ||
na teṣāmabhisaṃskāraḥ samādhī riddhikāraṇam |
vipāka eṣa śūrāṇāṃ nityakālaṃ samāhitaḥ || 121 ||
vipākajāye ṛddhīye gacchantī kṣetrakoṭyaḥ |
paśyanti lokapradyotān yathā gaṅgāya vālikā || 122 ||
upapattiścyutisteṣāṃ yathā cittasya vartate |
cittasya vaśitāṃ prāptāḥ kāyasteṣāṃ prabhāsvaraḥ || 123 ||
bhāvanāmayi ṛddhīye ye sthitā buddhaśrāvakāḥ |
tebhiḥ saṃskāraṛddhīye kalāṃ nāyānti ṣoḍaśīm || 124 ||
na teṣāṃ sarvadevebhirāśayaḥ śakyu jānitum |
anyatra lokanāthebhyo ye vā teṣāṃ same sthitāḥ || 125 ||
na teṣāmasti khālityaṃ na caiva palitaṃ śire |
audārikā jarā nāsti na duḥkhamaraṇaṃ tathā || 126 ||
saṃśayo vimatirnāsti kāṅkṣā teṣāṃ na vidyate |
rātriṃdivaṃ gaveṣanti sūtrakoṭīśatāni te || 127 ||
prahīṇānuśayāsteṣāṃ yāvantaḥ sāṃkileśikāḥ |
samacittāḥ sadā bhonti sarvasattvāna te'ntike || 128 ||
samādhikoṭiniyutāṃ nirdiśanti daśaddiśe |
praśnakoṭīsahasrāṇi vyākurvan hyanavasthitāḥ || 129 ||
strīsaṃjñā puruṣasaṃjñā ca sarvasaṃjñā vibhāvitāḥ |
sthitā abhāvasaṃjñāyāṃ deśenti bhūtaniścayam || 130 ||
pariśuddhena jñānena yathāvaddharmadeśakāḥ |
dharmasaṃgītyābhiyuktāḥ samādhijñānagocarāḥ || 131 ||
yāpi dhyānacaristeṣāṃ nāsau bhāvapratiṣṭhitā |
avandhyaṃ vacanaṃ teṣāmavandhyā dharmadeśanā || 132 ||
sulabdhaṃ tena mānuṣyaṃ prahīṇāḥ sarvi akṣaṇāḥ |
kṛtajñāḥ sarvabuddhānāṃ yeṣāṃ sūtramidaṃ priyam || 133 ||
kalpā acintiyāstehi ye saṃsārāttu choritāḥ |
yairitaḥ sūtraśreṣṭhāto dhṛtā gāthā catuṣpadā || 134 ||
dṛṣṭāste sarvabuddhehi taiste buddhāśca satkṛtāḥ |
kṣipraṃ ca bodhiṃ prāpsyanti teṣāṃ sūtramidaṃ priyam || 135 ||
na teṣāṃ kāṅkṣa vimatī sarvadharmeṣu bheṣyatī |
āsannā nirvṛtisteṣāṃ yeṣāṃ sūtramidaṃ priyam || 136 ||
dṛṣṭastehi mahāvīro gṛdhrakūūṭe tathāgataḥ |
sarve vyākṛtu buddhena drakṣyanti maitrakaṃ jinam || 137 ||
dṛṣṭvā maitreya saṃbuddhaṃ lapsyante kṣānti bhadrikām |
ye keci kṣayakālasminniha sūtre pratiṣṭhitāḥ || 138 ||
sthitāste bhūtakoṭīye bhūtakoṭiracintiyā |
acintiyāyāṃ koṭīye kāṅkṣā teṣāṃ na vidyate || 139 ||
na teṣāṃ vidyate kāṅkṣā aṇūmātrāpi sarvaśaḥ |
aṇūmātre prahīṇesmin bodhisteṣāṃ na durlabhā || 140 ||
caratāṃ duṣkaraṃ caiva kṣayakāle subhairave |
śikṣitva sūtraratne'smin pratibhānasmi akṣayam || 141 ||
idaṃ sūtraṃ priyaṃ kṛtvā buddhānāṃ gañjarakṣakāḥ |
sarvabuddhāniyaṃ pūjā dharmapūjā acintiyā || 142 ||
na teṣāṃ durlabhaṃ jñānaṃ buddhajñānamacintiyam |
dhārayiṣyantidaṃ sūtraṃ kṣayakālesmi dāruṇe || 143 ||
yebhiśca pūrvabuddhānāmime sūtrānta dhāritāḥ |
teṣāṃ kāyagatā ete kṣayakāle pravartiṣu || 144 ||
te te nādaṃ nadiṣyanti buddhānāṃ kṣetrakoṭiṣu |
saṃmukhaṃ lokanāthānāṃ śākyasiṃhasya yā carī || 145 ||
siṃhanādaṃ nadantaste buddhanādamacintiyam |
anantapratibhānena vakṣyante bodhimuttamām || 146 ||
te te vyākṛta buddhena ikṣvākukulasaṃbhavāḥ |
ye rakṣiṣyantimāṃ bodhiṃ kṣayakāle mahābhaye || 147 ||
te te rūpeṇa saṃpannā lakṣaṇehi vicitritāḥ |
vikurvamāṇā yāsyanti buddhakoṭīya vandakāḥ || 148 ||
māyopamehi puṣpehi hemavarṇanidarśanaiḥ |
rūpyāmayehi puṣpehi vaidūryasphaṭikehi ca || 149 ||
sarvāṇi ratnajātāni prādurbhontyeṣu pāṇiṣu |
yairākiranti saṃbuddhān bodhimārgagaveṣakāḥ || 150 ||
citrā nānāvidhā pūjā vādyanirhārasaṃpadā |
niścarī romakūpebhyo yathā gaṅgāya vālikāḥ || 151 ||
ye ca śṛṇvanti taṃ śabdaṃ sattvakoṭyo acintiyāḥ |
bhavantyavinivartyāste buddhajñāne anuttare || 152 ||
teṣāṃ ca buddhakoṭīnāṃ varṇaṃ bhāṣantyacintiyam |
acintiyeṣu kṣetreṣu teṣāṃ śabdaḥ śruṇīyati || 153 ||
ye ca śṛṇvanti taṃ śabdaṃ teṣāṃ saṃjñā nirudhyate ||
nirodhitāyāṃ saṃjñāyāṃ buddhān paśyantyanalpakān || 154 ||
etādṛśena jñānena caritvā bodhicārikām |
kṛtvārthaṃ sarvasattvānāṃ bhavantyarthakarā jināḥ || 155 ||
guṇānuśaṃsā ityete yā labhante ha paṇḍitāḥ |
anye aparimāṇāśca yairiyaṃ bodhi dhāritā || 156 ||
mātṛgrāmo'pidaṃ sūtraṃ śrutvā gāthāpi dhārayet |
vivartayitvā strībhāvaṃ sa bhaved dharmabhāṇakaḥ || 157 ||
na sā puno'pi strībhāvamitaḥ paścād grahīṣyati |
bhavet prāsādiko nityaṃ lakṣaṇaiḥ samalaṃkṛtaḥ || 158 ||
śreṣṭhe'tha iha sūtrasmin guṇāḥ śreṣṭhāḥ prakāśitāḥ |
te'sya sarve bhaviṣyanti kṣipraṃ bodhiṃ ca prāpsyate || 159 ||
viśāradaśca so nityaṃ bhoti sarvāsu jātiṣu |
dhārayitvā idaṃ sūtraṃ bodhisattvāna gocaram || 160 ||
janako bodhisattvānāṃ samādhiḥ śānta bhāṣitaḥ |
ya icched buddhituṃ bodhimidaṃ sūtraṃ pravartayet || 161 ||
āsannāste munīndrāṇāmāsannā vuddhabodhaye |
lapsyanti nacireṇemāṃ bhūmiṃ śāntāṃ samāhitāḥ || 162 ||
iha bodhīya te śūrā bodhisattvāḥ sthitāḥ sadā |
paśyanti buddhakoṭīyo yathā gaṅgāya vālikāḥ || 163 ||
rājā bhavitvā mahīpati cakravartī
dṛṣṭvā ca buddhān virajān suśāntacittān |
gāthāśataistāṃ staviṣyati lokanāthān
sa labhitva śāntaṃ imu virajaṃ samādhim || 164 ||
so pūja kṛtva atuliya nāyakānāṃ
sumahāyaśānāṃ devanarottamānām |
muktvā sa rājyaṃ yathariva kheṭapiṇḍaṃ
śuddho viśuddhaścariṣyati brahmacaryam || 165 ||
sa pravrajitva jinavaraśāsanasmiṃ
labdhvāpi caitaṃ viraju samādhi śāntam ||
kalyāṇavākyo madhuragiraḥ sa bhūtvā
adhiṣṭhānu dhīmān bhaviṣyati sūtrakoṭyāḥ || 166 ||
śūnyānimittaṃ paramapraṇītu śāntaṃ
dharma praśāntaṃ cara nipuṇaṃ asaṅgam |
svabhāvaśūnyaṃ sada virajaṃ praśāntaṃ
samādhiprāptyā bahu jani saṃprakāśayī || 167 ||
gambhīrabuddhī satatamanantabuddhī
vistīrṇabuddhī aparimitārthabuddhī |
gambhīra śāntaṃ labhiya imaṃ samādhi-
mālokaprāpto bhaviṣyati sarvalokaḥ || 168 ||
śuciśca nityaṃ bhaviṣyati brahmacārī
sa nirāmagandhaḥ satatamasaṃkiliṣṭaḥ |
anyāṃśca tatra sthapiṣyati sattvakoṭayo
labdhvā praśāntaṃ imu virajaṃ samādhim || 169 ||
sa sutīkṣṇaprajño bhaviṣyati śreṣṭhaprajñaḥ
śrutisāgaro'sau nityamanantabuddhiḥ |
kalyāṇavākyo matikuśalo vidhijño
dhāritva śāntiṃ imu virajaṃ samādhim || 170 ||
ye karmasthānā tathariva śilpasthānā
bhaiṣajyasthānāstathariva auṣadhīnām |
sarvatra dhīro bhaviṣyati pāraprāpto
dhāritva sūtraṃ imu virajaṃ samādhim || 171 ||
kāvyeṣu śāstreṣu tathapi ca hāsyalāsye
nṛtye'tha gīte sukuśala pāraprāptaḥ |
ācāryu loke bhaviṣyati nityakālaṃ
dhāritva śāntaṃ imu virajaṃ samādhim || 172 ||
parivāravān so bhaviṣyati nityakālaṃ
sa abhedyapakṣaḥ sada sahitaḥ samagraḥ |
caramāṇu śreṣṭhāṃ varāṃ śiva bodhicaryāṃ
dhāritva sūtraṃ imu virajaṃ samādhim || 173 ||
śokātha śalyā tathariva cittapīḍā
no tasya jātu bhaviṣyati paṇḍitasya |
ārogyaprāpto bhaviṣyati sarvakālaṃ
dhāritva śāntaṃ imu virajaṃ samādhim || 174 ||
ye kāyaśūlāstathariva cittaśūlāḥ
ye dantaśūlāstathapi ca śīrṣaśūlāḥ |
no tasya bhontī vyādhayu jīvaloke
dhāritva śāntaṃ imu virajaṃ samādhim || 175 ||
yāvanta rogā bahuvidha martaloke
ye kāyarogāstathariva cittarogāḥ |
te tasya rogāḥ satata na jātu bhonti
dhāritva śāntaṃ imu virajaṃ samādhim || 176 ||
cittasya vā ye bahuvidhu yatkileśāḥ
kāye vāpi bahuvidha rogajātāḥ |
te tasya nāstī bahuvidha saṃkileśā
dhāritva śāntaṃ imu viraja samādhim || 177 ||
yathantarīkṣaṃ gaganamanopaliptaṃ
prakṛtiviśuddhaṃ vimala prabhāsvaraṃ ca |
cittaṃ tathaiva bhavati viśuddha tasyo
dhāritva śāntaṃ imu virajaṃ samādhim || 178 ||
candrasya ābhā tathariva sūryaābhā
śuddhā agrāhyā bhavati prabhāsvarāśca |
cittaṃ tathaiva bhavati prabhāsvaraṃ ca
dhāritva śāntaṃ imu virajaṃ samādhim || 179 ||
yatha antarīkṣaṃ na sukaru citraṇāya
raṅgān gṛhītvā bahuvidha naikarūpān |
cittaṃ tathaiva na sukaru citrituṃ
sevetva śāntaṃ imu virajaṃ samādhim || 180 ||
vāto yathaiva caturdiśa vāyamāno
asajjamāno vrajati diśaḥ samantāt |
vātasamānā bhavati sa cittadhārā
jagi so asakto vrajati anopaliptaḥ || 181 ||
jālena śakyaṃ gṛhṇitu vāyamānaḥ
pāśena cāpī bandhitu śakya vātaḥ |
no tasya cittaṃ sukaru vijānanāya
bhāvetva śāntamimu virajaṃ samādhim || 182 ||
pratibhāsu śakyaṃ jalagata gṛhṇanāya
saṃprāptu toyaṃ tathapi ca tailapātre |
no tasya cittaṃ sukaru vijānanāya
bhāvetva śāntaṃ imu virajaṃ samādhim || 183 ||
garjanti meghā vidyulatā carantā
śakyaṃ grahītu pāṇina mānuṣeṇa |
no tasya cittaṃ sukaru pramāṇu jñātuṃ
bhāvetva śāntaṃ imu virajaṃ samādhim || 184 ||
sattvāna śakyaṃ rūtaravitaṃ grahītuṃ
ye santi sattvā daśadiśi buddhakṣetra |
cittasya tasyo na sukaru jñātu koṭiṃ
samādhilabdho yada bhavi bodhisattvaḥ || 185 ||
so tāṃ labhitva virajaṃ samādhibhūmiṃ
asaṃṃkiliṣṭo bhavati anopaliptaḥ |
no tasya bhūyo tribhavi niveśa jātu
anena labdho bhavati samādhi śāntaḥ || 196 ||
no kāmalolo na ca puna rūpalolo
na istrilolo na ca puna bhrāntacittaḥ |
śāntaḥ praśānto bhavati anopalipto
yada bhoti labdho ayu virajaḥ samādhiḥ || 187 ||
na putralolo na ca puna dhītalolo
no bhāryalolo na ca parivāralolaḥ |
suśāntacārī bhavati anopalipto
yada bhoti labdho ayu virajaḥ samādhiḥ || 188 ||
na hiraṇyalolo na ca punararthalolo
na svargalolo dhanarataneṣvasaktaḥ |
suviśuddhacitto bhavati sa nirvikalpaḥ
samādhiprāpto ayu bhavatī viśeṣaḥ || 189 ||
na svargahetoścarati sa brahmacaryaṃ
na svargalolo dadati sadā nu vijñaḥ |
saṃbodhikāmaḥ kuśalacariṃ carantaḥ |
samādhiprāpto ayu bhavatī viśeṣaḥ || 190 ||
no rājyahetoścarati tapo vrataṃ vā
naiśvaryamarthāstribhuvani prārthamānaḥ |
saṃbodhilolo bahujanahitāya
niṣpādayī so imu virajaṃ samādhim || 191 ||
no tasya rāgo janayati jātu pīḍāṃ
yo na strīlolo so bhavati bhrāntacittaḥ |
tathāpi tena prakṛtiprajñāya rāgo
labhitva etaṃ viraju samādhi śāntam || 192 ||
no tasya doṣo janayati jātu pīḍāṃ
vyāpādu yeno pratighamatho kareyya |
maitrāya teno nihata sa doṣadhātu
pratilabhya etaṃ viraju samādhi śāntam || 193 ||
no tasya moho janayati jātu pīḍāṃ
prajñāya teno nihata sa moha avidyā |
taṃ jñānu labdhaṃ vitimiramaprameyaṃ
samādhiprāpte imi guṇa aprameyāḥ || 194 ||
aśubhāya rāgaḥ satata sunigṛhīto
maitryāya doṣo nihatu sadā aśeṣaḥ |
prajñāya moho vidhamiya kleśajālaṃ
samādhiprāptaḥ pratapati sarvaloke || 195 ||
no tasya middhaṃ janayati jātu pīḍāṃ
subhāvitā se vividha utkileśāḥ |
anopalipto bhavati ca vipramuktaḥ
samādhiprāpte imi guṇa aprameyāḥ || 196 ||
no tasya moho janayati jātu pīḍāṃ
tathā hi tyāge abhiratu nityakālam |
sarvasvatyāgī bhavati sukhasya dātā
ya imaṃ samādhiṃ dhārayati bodhisattvaḥ || 197 ||
sthāmenupeto bhavati anopameyo
sa balenupeto bhavati nityakālam |
no tasya loke bhavati samaḥ kadācid
ya imaṃ samādhiṃ dhārayati bodhisattvaḥ || 198 ||
yadāpi rājā sa bhavati cakravartīṃ
manujānu loke upagata jambudvīpe |
tadāpi bhotī bahujanapūjanīyo
viśeṣaprāpto matima viśiṣṭaprajñaḥ || 199 ||
ye bhonti mukhyāḥ kularatanā viśiṣṭāḥ
suprabhūtabhogā bahujanasvāpateyāḥ |
yatrāśva hastī rathavara yugyayānā
hiraṇyasvarṇaṃ maṇīratanaṃ prabhūtam || 200 ||
ye śrāddha bhontī iha varabuddhajñāne
te jambudvīpe kularatanābhiyuktāḥ |
tatropapannaḥ kularatane viśiṣṭe
karoti so'rthaṃ suvipula jñātisaṃghe || 201 ||
aśrāddha ye vā iha kula jambudvipe
śraddhāṃ sa teṣāṃ janayati apramattaḥ |
yaṃ bodhicitte pratiṣṭhiti sattvakāye
te buddha bhontī jinapravaraḥ svayaṃbhūḥ || 202 ||
te ca spṛśitva atuliyamagrabodhiṃ
cakraṃ pravartentyasadṛśa buddhakṣetre |
ye co vijānī imu tada dharmacakraṃ
anutpattidharme nikhila te saṃpratiṣṭhī || 203 ||
subahukarāśco ami tada bodhisattvāḥ
sattvāna bhonti satatu te pūjanīyāḥ |
karonti te'rthaṃ atuliya nityakālaṃ
sattvāna cakṣurvitimiru te janenti || 204 ||
bahava śatasahasrāḥ sattvakoṭī anantā
yeṣa kuśalamūlā bhonti tatra śruṇitvā |
te api pratilabhante uttamaṃ bodhicittaṃ
yada jinu anuśāsī bodhisattvaṃ mahātmā || 205 ||
aśūnyakṣetrā pramudita bhonti nityaṃ
nirupalepā ami tada buddha bhontī |
yatra sthihantī imi tada bodhisattvāḥ
sattvānamartha aparimitaṃ karonti || 206 ||
rakṣanti śīlaṃ asadṛśu brahmacaryaṃ
bhāvī samādhī vipulamanantakalpān |
dhyāne vimokṣe suniśrita nityakālaṃ
te bodhisattvā bhavi sada buddhaputrāḥ || 207 ||
te ṛddhipādān satat niṣevamāṇā
kṣetrāṇi gatvā bahu vividhānanantān |
śṛṇvanti dharmaṃ sugatavaraprabhāṣaṃ
sarvaṃ ca gṛhṇī pratiṣṭhitu dhāraṇīye || 208 ||
prabhāṣi sūtrānaparimitānanantān
ye dhāraṇīye pratiṣṭhitu bodhisattvāḥ |
sattvāna arthaṃ aparimitaṃ karonti
ye dhāraṇīye pratiṣṭhitu bodhisattvāḥ || 209 ||
cyutopapādaṃ jānāti sattvānāmāgatiṃ gatim |
yādṛśaṃ taiḥ kṛtaṃ karma vipāko'pi ca tādṛśaḥ || 210 ||
karmaṇo na ca saṃkrāntiraṇumātrāṇi labhyate |
te'pi teṣāṃ vijānanti bodhisattvā mahāyaśāḥ || 211 ||
śūnyatā ca mahātmānāṃ vihāro bhoti uttamaḥ |
sthāpayanti mahāyāne sattvakoṭīracintiyāḥ || 212 ||
na teṣāmovadantānāṃ sattvasaṃjñā pravartate |
apravṛttiṃ ca dharmāṇāṃ bodhisattvāḥ prakāśayī | 213 ||
na prakāśayatāṃ dharmāṇupalambhaḥ pravartate |
śūnyāvihāriṇo bhonti dṛḍhajñāne pratiṣṭhitāḥ || 214 ||
uddiśyemaṃ samādhiṃ ca vihāraṃ sarvaśāstunām |
na teṣāṃ vartate saṃjñā istrisaṃjñā svabhāvatā || 215 ||
istrisaṃjñāṃ vibhāvitvā bodhimaṇḍe niṣīdati |
bodhimaṇḍe niṣiditvā mārasaṃjñā nivartate || 216 ||
na cātra paśyate māraṃ mārasainyaṃ ca paṇḍitaḥ |
na ca paśyati mārasya tisro duhitaro'pi saḥ || 217 ||
bodhimaṇḍe niṣaṇṇasya sarvasaṃjñā prahīyate |
saervasaṃjñāprahīṇasya sarvā kampati medinī || 218 ||
sumeravaḥ samudrāśca yāva santi daśā diśe |
taṃ ca sattvā vijānanti sarvadikṣu daśasvapi || 219 ||
bodhisattvasya ṛddhyeyaṃ medinī saṃprakampitā
ṣaḍvikāraṃ tadā kāle budhyato bodhimuttamām || 220 ||
yāvantaḥ saṃskṛtā dharmā ye ca dharmā asaṃskṛtāḥ |
sarvāṃstān budhyate dharmān dharmaśabdena deśitān || 221 ||
na cātra budhyate kaścit siṃhanādaśca vartate |
vartanīyaṃ vijānitvā bhoti buddhaḥ prabhākaraḥ || 222 ||
pratītya dharmā vartante utpadyante pratītya ca |
pratītyatāṃ yaddharmāṇāṃ sarve jānanti te viduḥ || 223 ||
vidhijñāḥ sarvadharmeṣu śūnyatāyā gatiṃgatāḥ |
gatiṃ ca te prajānanti sarvadharmagatiṃgatāḥ || 224 ||
gatimetāṃ gaveṣitvā bodhisattvo na labhyate |
yenaiṣā sarvabuddhānāṃ jñātā gatiracintiyā || 225 ||
sa tāṃ gatiṃ gato bhoti yaḥ sarvāṃ gati jānati |
sarvasya māyā ucchinnā jñātvā saddharmalakṣaṇam || 226 ||
bodhimaṇḍe niṣīditvā siṃhanādaṃ nadī tathā |
vijñāpayī kṣetrakoṭīraprameyā acintiyāḥ || 227 ||
tāṃśca prakampayī sarvā buddhavīrā mahāyaśāḥ |
yatha vainayikān sattvān vinetī sattvasārathiḥ || 228 ||
spṛśitvā uttamāṃ bodhiṃ bodhimaṇḍāttu utthitaḥ |
vineyān vinayet sattvānaprameyānacintiyān || 229 ||
tato nirmiṇi saṃbuddho anantān buddhanirmitān |
kṣetrakoṭīsahasrāṇi gacchantī dharmadeśakāḥ || 230 ||
sthāpayantyagrabodhīye sattvakoṭīracintiyāḥ |
deśayantyuttamaṃ dharmaṃ hitārthaṃ sarvaprāṇinām || 231 ||
īdṛśaṃ tanmahājñānaṃ buddhajñānamacintiyam |
tasmājjanayatha cchandaṃ bodhicchandamanuttaram || 232 ||
janetha gauravaṃ buddhe dharme saṃghe guṇottame |
bodhisattvāna śūrāṇāṃ bodhimagryāṃ niṣevatām || 233 ||
anolīnena cittena satkarotha atandritāḥ |
bhaviṣyatha tato buddhā nacireṇa prabhākarāḥ || 234 ||
ye ca kṣetrasahasreṣu bodhisattvā ihāgatāḥ |
paśyanti lokapradyotaṃ dharmaṃ deśentamuttamam || 235 ||
okiranti mahāvīrā mahāratnehi nāyakam |
māndāravehi puṣpehi okirī bodhikāraṇāt || 236 ||
alaṃkarontidaṃ kṣetraṃ buddhakṣetramanuttaram |
ratnajālena cchādenti samantena diśo daśa || 237 ||
patākā avasaktāśca ucchritā dhvajakoṭayaḥ |
alaṃkārairanantaiśca idaṃ kṣetramalaṃkṛtam || 238 ||
kūṭāgārāṃśca māpenti sarvaratnavicitritān |
prāsādaharmyaniryūhānasaṃkhyeyān manoramān || 239 ||
vimānānyardhacadrāṃśca gavākṣān pañjarāṃstathā |
dhūpitā dhvajaghaṭikā nānāratnavicitritāḥ || 240 ||
dhūpyamānena gandhena abhrakūṭasamaṃ sphuṭam |
kṣetrakoṭīsahasreṣu vāti gandho manoramaḥ || 241 ||
te ca sarve spharitvāna gandhavarṣaṃ pravarṣiṣuḥ |
ye ca ghrāyanti taṃ gandhaṃ te buddhā bhonti nāyakāḥ || 242 ||
rāgaśalyaṃ prahīṇaiṣāṃ doṣaśalyaṃ na vidyate |
vidhvaṃsitaṃ mohajālaṃ tamaḥ sarvaṃ vigacchati || 243 ||
ṛddhiṃ ca tatra sparśenti balabodhyaṅga indriyān |
dhyānavimokṣān sparśenti bhonti co dakṣiṇārhāḥ || 244 ||
pañcakoṭīya prajñaptā vastrakoṭībhi saṃstṛtā |
saṃchannā ratnajālehi cchatrakoṭībhi citritāḥ || 245 ||
niṣaṇṇāstatra te śūrā bodhisattvāḥ samāgatāḥ |
lakṣaṇaiste virocante tathānuvyañjanairapi || 246 ||
vṛkṣai ratnamayaiḥ sarvaṃ buddhakṣetramalaṃkṛtam |
nirmitāḥ puṣkariṇyaśca aṣṭāṅgajalapūritāḥ || 247 ||
pānīyaṃ te tataḥ pītvā puṣkariṇītaṭe sthitāḥ |
sarve tṛṣṇāṃ vinoditvā bhonti lokasya cetiyāḥ || 248 ||
anyonyeṣu ca kṣetreṣu bodhisattvāḥ samāgatāḥ |
buddhasya varṇaṃ bhāṣante śākyasiṃhasya tāyinaḥ || 249 ||
śṛṇvanti ye ca taṃ varṇaṃ te bhontī lokanāyakāḥ |
acintyā anuśaṃsā me iha sūtre prakāśitāḥ || 250 ||
svarṇamayehi patrehi padmakoṭyo acintiyāḥ |
śuddhasyoragasārasya karṇikāstatra nirmitāḥ || 251 ||
vaiḍūryasya ca daṇḍāni sphaṭikasya ca pañjarāḥ |
kesarā girigarbhasya māpitāstatra śobhanāḥ || 252 ||
ye ca ghrāyanti taṃ gandhaṃ niścarantaṃ manoramam |
teṣāṃ sarve praśāmyanti vyādhayaḥ prītacetasām || 253 ||
rāgo dveṣaśca mohaśca aśeṣāstehi kṣīyate |
trīn doṣān kṣapayitvā ca bhonti buddhā sukhaṃdadāḥ || 254 ||
śabdastato niścarati buddhaśabdo hyacintiyaḥ |
saddharmasaṃghaśabdaśca viniścarati sarvataḥ || 255 ||
śūnyatā animittasya svaro apraṇihitasya ca |
śrutvā taṃ sattvakoṭīyo bhontivaivartikā bahu || 256 ||
niścaraṃścaiva śabdo'sau kṣetrakoṭīṣu gacchati |
sthāpenti buddhajñānasmin sattvakoṭīracintiyāḥ || 257 ||
śakuntā kalaviṅkāśca jīvaṃjīvakapakṣiṇaḥ |
te'pi pravyāharī śabdaṃ buddhaśabdamanuttaram || 258 ||
ratnāmayāśca te vṛkṣā iha kṣetrasmi nirmitāḥ |
viśiṣṭā darśanīyāśca maṇīvṛkṣā manoramā || 259 ||
lambante teṣu vṛkṣeṣu sarvābharaṇaveṇayaḥ |
anubhāvena buddhasya iha kṣetrasmi nirmitāḥ || 260 ||
na so'sti keṣucid vyūhaḥ sarvakṣetreṣu sarvaśaḥ |
yo neha dṛśyate kṣetre tadviśiṣṭatamastadā || 261 ||
peyālametadākhyātaṃ śākyasiṃhena tāyinā |
na te jñāne'tra kāṅkṣati bodhisatvā mahāyaśāḥ || 262 ||
koṭīya etāṃ budhyanti gatisteṣāmacintiyā |
jñānena te vivardhante sāgaro vā sravantibhiḥ || 263 ||
na teṣāṃ labhyate'nto hi pibato vā mahodagheḥ |
ākhyāto bodhisattvānāṃ nayo hyeṣa acintiyaḥ || 264 ||
iha koṭayāṃ sthitāḥ śūrā bodhisattvā yaśasvinaḥ |
svarāṅgāni pramuñcanti yathā gaṅgāya vālikāḥ || 265 ||
tataścintyaḥ svaro'pyevaṃ bodhisattvo na manyate |
manyanāyāṃ prahīṇāyāmāsanno bhoti bodhate || 266 ||
na sa śīlaṃ vilumpeti api jīvitakāraṇāt |
aviluptaḥ sa carati bodhisattvo dṛḍhavataḥ || 267 ||
nāsau bhūyo vilupyeta kamasaṃjñāya sarvaśaḥ |
sarvasaṃjñāprahīṇasta aprameyāḥ samādhayaḥ || 268 ||
samāhitaḥ sa carati sajjate na samādhiṣu |
asaktaścāpramattaśca nāsau lokeṣu sajjate || 269 ||
lokadhātūnatikramya sa gacchati sukhāvatīm |
gataśca tatra saṃbuddhamamitābhaṃ sa paśyati || 270 ||
bodhisattvāṃśca tān śūrān lakṣaṇaiḥ samalaṃkṛtān |
pañcābhijñāpāramiṃ ca prāptā dhāraṇigocarāḥ || 271 ||
gacchanti kṣetrakoṭīyo buddhānāṃ pādavandakāḥ |
obhāṣayanto gacchanti buddhakṣetrānacintiyān || 272 ||
sarvadoṣaprahīṇāśca sarvakleśaviśodhitāḥ |
sarvakleśasamucchinnā ekajātisthitā jināḥ || 273 ||
na co apāyān gacchanti tasmāt kṣetrāttu te narāḥ |
sarve'pāyā samucchinnāstasmin kṣetre aśeṣataḥ || 274 ||
bodhitā buddhaśreṣṭhena amitābhena tāyinā |
karotha mā tatra kāṅkṣāṃ gamiṣyatha sukhāvatīm || 275 ||
yaḥ kṣetraśreṣṭhasya śruṇitva varṇaṃ
cittaprasādaṃ pratilabhi mātṛgrāmaḥ |
sa kṣipra bhotī puruṣavaraḥ suvidvān
ṛddhyā ca yāti kṣetrasahasrakoṭīḥ || 276 ||
yāvanti pūjā bahuvidha aprameyā
yā kṣetrakoṭīnayutayabiṃbareṣu |
tāṃ pūja kṛtva puruṣavareṣu nityaṃ
saṃkhyākalāpī na bhavati maitracittaḥ || 277 ||
śīlaṃ samādhiṃ satatu niṣevamāṇo
dhyānān vimokṣāṃstathapi ca apramāṇān |
śūnyānimittān satatu niṣevamāṇo
nacireṇa so hi sugatu bhavati loke || 278 ||
eṣā hi pūjā paramā viśiṣṭa mahyaṃ
yaḥ śīlaskandhe pratiṣṭhitu bodhisattvo |
sada sarvabuddhāstena supūjitā hi
kṣayāntakāle yaḥ sthitu bodhicitte || 279 ||
suparīnditāste buddhasahasrakoṭyo
ye bodhisattvā imu kṣayi kāli ghore |
rakṣanti dharmaṃ sugatavaropadiṣṭaṃ
te mahya putrāścarimaka dharmapālāḥ || 280 ||
iti śrīsamādhirāje sūtradhāraṇānuśaṃsāparivarto nāma dvātriṃśatitamaḥ || 32 ||